Tgenina equipa da hockey grischuna è la segund meglra suenter il Club da hockey da Tavau? Quella dumonda sclerescha adina puspè il derbi grischun en la My Hockey League tranter l'EHC Arosa e l'EHC Cuira. Suenter l’emprim inscunter da questa stagiun è Arosa il prinzi da hockey suenter il retg HCD. En ina partida stretga ed intensiva, dentant er faira batta l'EHC Arosa il rival da la chapitala, l'EHC Cuira cun il resultat minimal dad 1:0. Il gol decisiv ha fatg Hassan Krayem.
Partida vess pudì cupitgar da mintga vart
Segir ha l'EHC Arosa gì la meglra entschatta en la partida. Davent dal principi ha Arosa fatg squitsch e mussà ina u l’autra buna acziun. In gol n'ha quai dentant betg dà, il cuntrari è stà il cas. Arosa ha incassà chastis, Cuira n'ha dentant betg pudì profitar da quests chastis. Alura è Cuira vegnì meglier en la partida, dentant er Cuira n'ha betg fatg il gol. Uschia han ils fans stuì spetgar fin en la 48avla minuta. Pir lura è gartegià ad Arosa l’emprim gol e quai è lura gist era stà il gol decisiv.
Arosa ha optimà l’equipa – Cuira ha investì
En vista a questa nova stagiun han omaduas equipas grischunas anc ina giada fatg in pass enavant: Tar l'EHC Arosa n'hai betg dà uschè blers midaments. Tuttina ha il club anc ina giada rinforzà l'equipa sin intginas posiziuns.
La fatscha da l'EHC Cuira è percunter tut i'autra che anc la stagiun passada. L’equipa da la chapitala ha midà la mesadad dal cader e para uss propi dad esser cumpetitiva en questa My Hockey League.
