Siglir tar il cuntegn

Header

Legenda: Mathias Flückiger sin ses e-mountainbike en il territori da Mustér. mad
cuntegn

E-mountainbike Emprim campiunadi svizzer a Mustér

Ils 19 da settember è ina data istorica per la scena dad e-mtb en Svizra. A Mustér vegn manà tras en collavuraziun cun Swiss Cycling l’emprim campiunadi svizzer dad e-mountainbike. Ils profis en questa disciplina cumbattan per l’emprim titel e per las emprimas medaglias.

audio
Ralph Näf davart l'emprim campiunadi svizzer dad e-mtb a Mustér
03:46 min, Actualitad dals 17.09.2021.
laschar ir. Durada: 03:46 minutas.

Mustér ha gia ina tscherta experientscha da realisar cursas dad e-mountainbike. L’onn passa è vegnì organisà in’emprima cursa per in e scadin ch’ha manà dal resort Catrina fin a Caischavedra en il territori da skis.

Il territori da Mustér è fitg adattà per ir cun e-bike. Igl è pretensius e taiss, simplamain perfetg.
Autur: Ralph Näf organisatur campiunadi svizzer e-mtb

La disciplina e-mountainbike sa sviluppescha rasant. Sin plaun internaziunal datti gia dapi intgins onns in seria da cursas. Er als davos trais campiunadis mundials da mountainbike è gia vegnì cumbattì per medaglias en questa disciplina. Tar las dunnas ha dacurt la Svizra Nicole Göldi triumfà a Val di Sole en l’Italia. Las cursas èn sumegliantas a quellas da cross country. Grazia al motor vegnan questas cursas dentant manadas tras sin percurs fitg tecnics e taiss.

Las cursas dad e-mountainbike èn fitg spectacularas, dentant er ina sfida per atlet e velo.
Autur: Ralph Näf anteriur profi da mtb

In bun mountainbiker da cross country na saja betg automaticamain er in bun e-mountainbiker. Quai saja ina disciplina differenta, uschia Ralph Näf, il schef d’equipa da Vital Albin u dal vicecampiun olimpic Mathias Flückiger. I dovra in tschert trenament per avair enta maun endretg il velo cun motor che paisa principalmain in bun tant dapli ch’in velo senza motor. Ils e-mountainbikes èn fin a 25 kilos grevs.

Malgrà ch'ils e-mountainbikes èn dapi intgins onns fitg populars e pli e pli derasads, las cursas dad e-mtb èn anc pir a l’entschatta. Pussibel dentant che quai sa mida ils proxims onns. E tenor Ralph Näf duai il 2022 er dar in campiunadi svizzer dad e-mountainbike, puspè a Mustér.

Actualitad 17:00

Artitgels legids il pli savens

Scrollar a sanestra Scrollar a dretga