Dapi il matg è Rolf Schrepfer en uffizi sco nov trenader dal club grischun en la MySports League. El duai purtar vent frestg dentant era success a l'EHC Arosa. E vent frestg ha Schrepfer era entupà sin il plaz. Numerus giugaders da tschep han bandunà il club ed èn vegnids remplazzads cun acturs giuvens. Pero talentads, constatescha il trenader. Ma a quella garda giuvna manchia l'experientscha da dar sin quest nivel, cunquai ch'ils blers hajan fin uss be giugà en ligas da juniors. Il pass da l'elita dals juniors en la MSL na dastgi betg vegnir sutstimà.
Finamira: Mezfinal dals playoffs
La finamira proclamada da la direcziun dal club da vulair cuntanscher il mezfinal dals playoffs saja ambiziunada. La veglia da ses giugadurs saja quà, era senti el il fieu e l'engaschi. Prognosas na vul Rolf Schrepfer betg far. I saja impurtant co sia equipa parti en la nova stagiun. Pir suenter las emprimas rundas possi vegnir giuditgà las fermezzas entaifer ils clubs da la MSL. L'EHC Arosa ha bain la pli giuvna equipa, ma era tut tschellas squadras han fatg pulitas midadas en lur caders ils ultims mais.
Il palmares dal nov a la banda
Avant che Rolf Schrepfer ha midà davos la banda è el en sias 530 partidas en la liga naziunala vegnì trais giadas campiun svizzer cun ils ZSC Lions (2000 e 2001) e cun l'SC Berna (2004). Cumenzà ha tut l'onn 1993 en sia patria, tar il HC Thurgau en la liga naziunala B. Surtut tar il ZSC e l'SCB valaiva el sco grond motivatur ed impurtanta pitga per il success. Turgovia e Weinfeldern èn lu stadas sias emprimas staziuns sco trenader. Ils ultims trais onns ha Rolf Schrepfer trenà l'elita dals juniors dals Rapperswil-Jona Lakers ch'el ha menà tut quels onns al titel da campiuns svizzers. Schrepfer sa legra sin sia emprima stagiun sco trenader en la terza auta liga da hockey svizra. E quai che pertutga ses nov club, l'EHC Arosa, è l'um da 47 onns optimist.