Siglir tar il cuntegn

Header

cuntegn

Regiunal EHC Arosa prepara comeback en la liga naziunala

29 onns suenter che l'EHC Arosa ha stuì sa retrair per motivs finanzials ord la liga naziunala A, prepara il club da hockey grischun ses comeback en la liga naziunala B. Ils iniziants èn persvadì che l'anteriur campiun svizzer dal hockey ha da porscher dapli che be potenzial nostalgic.

Ina gruppa ord la regiun vul nizzegiar la chaschun che la NLB duai vegnir schlargiada. Ils proxims dis vegnan inoltrads ils documents necessaris a la Federaziun naziunala. Planisà saja in budget da 1,6 milliuns francs.

Il president dal club, Ludwig Waidacher, ha declerà ch'els vegnan ad ademplir tuttas premissas. Il sponsur principal, in'interpresa da bus naziunal, examinescha d'augmentar ses engaschi economic.

En questa stagiun ha Arosa ha pers bunamain tut ils gieus en l'emprima liga e vegn schizunt relegà en la segunda liga. Il club vul dentant nizzegiar il schlargiament da la liga naziunala B, vul pia far il pass en la segund'auta liga vid la «maisa verda». La NLB duai vegnir augmentada da 9 sin 12 equipas, premissa è sulet ina buna situaziun economica.

L'EHC Arosa è stà 9 giadas campiun svizzer, dal 1951 fin il 1957 (7 giadas en roda), il 1980 e l'ultima giada il 1982, il 1981 ed il 1984 è el stà vicecampiun.

RR novitads 18:00

Artitgels legids il pli savens