Siglir tar il cuntegn

Regiunal EHC Arosa sin buna via en la liga naziunala B

Il club da tradiziun EHC Arosa ha surdà a la Federaziun svizra da hockey sin glatsch il dossier, il giavisch per far il pass en la liga naziunala B. La segunda auta liga da hockey en Svizra vegn augmentada la proxima stagiun da 9 sin 12 clubs.

3 giugaders da l'EHC Arosa.
Legenda: Turna l'EHC Arosa enavos sin la carta dal hockey svizzer? mad

Ils clubs da hockey, era quels en las ligas pli bassas, han survegnì la schanza d’inoltrar il giavisch da giugar la proxima stagiun en la liga naziunala B. Arosa ha nizzegià quest’offerta. Tenor la direcziun dal club hajan els pudì inoltrar in dossier che adempleschia tut ils criteris e las cundiziuns da la Federaziun svizra. Sper Arosa han anc ulteriurs clubs annunzià quest giavisch, tranter auter Winterthur, Herisau e Visp. Ussa ha la liga naziunala da decider surlonder. Survegn l’EHC Arosa glisch verda fiss la via libra per giugar la proxima stagiun en la liga naziunala B. Il club fa quint cun in budget da bun 1,6 milliuns francs. Enfin la fin da zercladur ha Arosa la finamira d’avair rimnà duas terzas dals daners. Il rest duai entrar grazia als gieus da chasa.

Far in grond pass enavant

L’EHC Arosa è vegnì relegà en questa stagiun da l’emprima en la segunda liga suenter il fiasco sportiv. Cun quella nova porta ch’è ussa s’averta vul il club dentant far in grond pass enavant enstagl enavos. Il president dal club, Ludwig Waidacher junior, discurra dad in pass «back to the roots». L’EHC Arosa è anc oz ina marca en il hockey svizra. Il hockey n’è betg sulet in sport ad Arosa, mabain in mitus. Grategiassi al club da tradiziun da giugar a partir da la stagiun 2015/2016 en la liga naziunala B turnass l’EHC Arosa er puspè enavos sin la carta dal hockey svizzer.

Sin il terz plaz

Cun 9 titels da campiun svizzer è l’EHC Arosa en questa statistica sin il terz plaz. Dapli titels han sulet il HCD ed il SCB gudagnà enfin oz. Ils onns glorius d’Arosa èn stads ils onns 50. Tranter il 1951 ed il 1957 ha il EHC Arosa festivà 7 titels da campiun svizzer en seria. Ils 2 ulteriurs titels ha Arosa festivà il 1980 ed il 1982, pia avant passa 3 decennis.