Elisa Gasparin ha fatg part bun 15 onns a la cuppa mundiala da biatlon. La carriera ha ella pudì terminar cun in punct culminant, il campiunadi mundial da chasa a Lai. En sia carriera ha ella cuntanschì dus plazs da podest en la cuppa mundiala, quai mintgamai cun la staffetta. Plinavant ha ella gudagnà trais diploms olimpics. Il 2014 a Sotschi è Elisa Gasparin vegnida 8avla en il sprint, quatter onns pli tard a Pyeongchang 8avla en la cursa singula e 6avla cun la staffetta svizra.
Jau sun fitg cuntenta, hai ina lavur che plascha e mia vita è il mument propi perfetga.
La fin mars 2025 è Elisa Gasparin stada per la davosa giada a la partenza, quai ad Oslo en la Norvegia nua ch’ella aveva era dà ses debut en la cuppa mundiala il mars 2010. Suenter 303 cursas ha ella mess ils skis da la vart e la buis surdà ad ina giuvna biatleta svizra. Suenter dus mais vacanzas ha Gasparin chattà ina lavur tar il turissem da Lai nua ch’ella è era da chasa.
Igl è stà in bel chapital, ma jau sun era cuntenta che quel è a fin ed jau sa legrel sin las novas istorgias da la vita.
Cun il sport da biatlon, cunzunt cun atletas ed atlets, ha Elisa Gasparin anc oz in stretg contact. Ma ella n'avessi nagin gust dad ir anc uss a la partenza. Oz persequiteschi ella pli gugent las cursas, era quellas da la sora Aita, cunzunt be a l’ur u a la televisiun.