Siglir tar il cuntegn
Inhalt

Regiunal Emprim club da futsal dal Grischun

In club da ballape dal Grischun en la liga naziunala B? Gea, quai datti. Mo na betg en il ballape pastget, mabain en il futsal, ballape en halla. L’emprim club grischun sa numna Futsal Club Engadin, fundà d'ina gruppa da Portugais en l'Engiadin’Ota. L’emprim president è Daniel Ricardo Rodrigues.

Il trenader Fernando José Madeira ed il president Daniel Ricardo Rodrigues cun il nov dress dal «Futsal club Engadin».
Legenda: Il trenader Fernando José Madeira ed il president Daniel Ricardo Rodrigues cun il nov dress dal «Futsal club Engadin». RTR, Roger Alig

Futsal è in sport dal sid

Che gest Portugais han fundà l’emprim club da futsal dal Grischun è nagina casualitad. Il sport deriva atgnamain da l'America dal sid. En l'Europa è futsal plitost derasà en ils pajais dal sid. Il pled futsal è ina cumposiziun dals pleds spagnols fútbol sala ni dil portugais futebol de salão.

Giugaders portugais cun l’emblem dal capricorn sin il dress

Il Futsal Club Engadin consista quasi exclusivamain da giugaders portugais. Malgrà ch'i vegn discurrì portugais en il club na vul il president Daniel Ricardo Rodrigues betg discurrer d'in club portugais. Els sajan averts per tuts. Perquei n’hajan els era betg tscharnì las colurs dil Portugal cotschen e verd sco colurs dil club. Lur dress saja blau-mellen ed en l’emblem saja in capricorn, in simbol tipic per l’Engiadina ed il Grischun.

Bleras differenzas tar il ballape

Tranter ballape e futsal datti bleras differenzas. En halla vegn dà cun 5 enstagl dad 11 giugaders. Tut è pli pign: la plazza, ils gols e schizunt la balla. La pli auta liga da futsal en Svizra è la Premier League, suandada da las ligas naziunalas A e B. Il Futsal Club Engadin cumenza ils 20 da november il campiunadi ella liga naziunala B. Giugà vegn mintgamai la dumengia en furma d’in pitschen turnier. Da chasa è il Futsal Club Engadin en il center da sport Promulins a Samedan. Sco ils blers giugaders vegn era il trenader dal Portugal. Fernando José Madeira ha gronda experientscha ed ha era gia trenà en il Portugal ed en l’Engalterra.

RR Sportissimo saira