Siglir tar il cuntegn

Header

video
Bindel da trenament per passlung a San Murezzan
Or da RTR Social dals 07.11.2022.
laschar ir. Durada: 1 minuta 16 Secundas.
cuntegn

Engiadina Nordic Bindel da trenament per passlung

Gia dapi passa 30 onns s’engascha il center da trenament Engiadina Nordic pe ils differents sports d’enviern. Quai che ha cumenzà fitg pitschen e creschì a la pli gronda organisaziun da promoziun e trenament da sports d’enviern en Engiadina.

Passa 50 atletas ed atlets pon trenar en il center ils pli differents sports sut cundiziuns professiunalas. Surtut il passlung vegn promovì en l'Engiadin'Ota tar scolaras e scolars dad 11 onns fin tar atletas ed atlets creschids. Sper il trenament cun skis da rodas, porscha il center uss era in trenament sin in bindel a San Murezzan.

audio
Adriano Iseppi davart bindel da trenament dad Engiadina Nordic
ord Actualitad dals 06.11.2022.
laschar ir. Durada: 1 minuta 58 Secundas.

Investiziun da 200’000 francs

Il nov bindel è in indriz che pussibilitescha il trenament da passlung da tutta aura e da tuttas cundiziuns. Igl è in patent ch'è trais meters lartg e tschintg meters lung. Sur ina rampa vegnan ins direct cun ils skis da rodas sin quest indriz. Il trenament cumenza alura sin il bindel plat. Tenor difficultad ed intensitad va il bindel pli spert ed el s'auza. Pli spert che quel va e dapli ch'el s'auza, e dapli forza ch'i dovra per sa tegnair en la posiziun.

audio
Curdin Räz e Nina Cantieni èn stads sin il bindel da trenament
ord Actualitad dals 06.11.2022.
laschar ir. Durada: 3 minutas 9 Secundas.

Las atletas ed ils atlets sin il bindel vegnan segirads cun ina corda. En in grond spievel sa vesan las atletas ed ils atlets e dus gronds visurs mussan ad els da tutta sort valurs. L’investiziun da 200’000 francs ha Engiadina Nordic finanzià cun rimnar daners online e cun il sustegn da numerus sponsurs e donaturs.

Bindel da trenament era per l’elita svizra

Fin uss datti quatter da quests bindels da trenament per passlung en Svizra. En il Grischun datti anc in bindel a Tavau. Cun l’investiziun a San Murezzan spera Engiadina Nordic da pussibilitar er ad atletas ed atlets da Swiss Ski da vegnir pli savens per il trenament en l'Engiadin'Ota.

RTR actualitad 17:00

Artitgels legids il pli savens

Scrollar a sanestra Scrollar a dretga