Dumagnar il sigl en il sport d’elita pretenda ina decisiun pel sport en la giuventetgna. Las structuras e pretaisas severas ed il squitsch da trenaders e trenadras ed er dals geniturs è savens però memia grond uschia ch'atletas ed atlets talentads cedan a la fin. Per ir a la tschertga dals motivs ed ils problems centrals han ils clubs da skis e passlung regiunals d’Engiadina organisà ina sairada da discussiun publica.
Plaschair en il center
Las anteriuras atletas ed atlets e corifeas dal sport d’elita, Marc Gini, Michi Bont, Tamara Wolf, Dario Cologna e Gian Gilli han discutà e raquinta da lur experientschas. Il pli impurtant tar il sport da prestaziun, gist en il temp da giuventetgna saja il plaschair vid quai ch’ins fetschia, è l’anteriur passlungist, Dario Cologna persvas. Er la diversitad – il polisportiv – saja impurtant tar giuvenils.
Entant che quai saja tar il sport da passlung pussaivel, saja quai tal skis alpin auter. Las structuras severas ed il squitsch sajan numnadamain enorm severas. Tenor l'expert da sport Gian Gilli stoppia dar adattaziuns tar las structuras federalas. Per ch'atletas ed atlets giuvens arrivan da metter tut sut in chapè ed dumognan il sigl en il mund dal sport d'elita, stoppia pia correspunder l’entir conturn.