La cursa da velo sur ils pli bels pass da la Svizra. Quai empermetta la reclama per la Alpenchallenge, la cursa populara da velo cun partenza ed arrivada en l’Arena da biatlon a Lantsch. In da quels pli bels pass fiss il Spleia. Mo sco RTR ha rapportà è quel serrà parzialmain pervia dad ina bova da la vart taliana. Ord motivs da segirtad hajan las autoritads talianas na betg pudì dar la lubientscha da passar il tschancun privlus. Uschia perda la Alpenchallenge quest onn sia attracziun principala. La varianta lunga da 191 km vegn stritgada, i resta mo la curta da 116 km. Mo era quella è tenor ils organisaturs ina «Challenge», ina sfida.
Pli curt, ma anc adina attractiv e stip
Ils trais pass Alvra, Malögia e Spleia, 191 km e varga 4'300 meters d'autezza. Quai fiss en sasez la cursa roiala da la Alpenchallenge. La curta maina «mo» sur 116 km sur ils pass Alvra e Gelgia, ha dentant tuttina bunamain 3’000 meters d’autezza. Tenor il schef dal comité d’organisaziun Stefan Schwenke na saja quai betg da sutstimar. Sco exempel numna il ciclist passiunà l’ascensiun finala da Casti a Lantsch. Quella saja pli stipa ch’il Pass dal Gelgia da la vart engiadinaisa. Era uschiglio saja la cursa curta ch’els numnan «Alpenchallenge Classic» attractiva. Ils varga milli ciclists da hobi possian passar dus bels pass, l’Alvra e la Gelgia e bellas regiuns sco la Val d’Alvra, l’Engiadina Ota ed il Surmeir.
RR actualitad 17:00