Siglir tar il cuntegn

Header

Navigaziun

cuntegn

Regiunal Fatschas cuntentas al «Nordic Culinaric»

Radund 200 curridras e curriders èn sa participads a Nordic Culinaric 2019, in’occurrenza da passlung culinarica sin la loipa Cadi. Per ina giada n'ha betg il temp quintà, mabain il plaschair da far passlung, star da buna cumpagnia e laschar gustar ils products dals purs da la regiun.

Cumenzà ha il di Nordic Culinaric cun in ensolver a Trun cun da tuttas sorts chaschiel, liongias, paun e tarschola. Silsuenter èn partids curridras e curriders en il stil classic, mes’ura pli tard tut ils auters ch’èn sa mess sin viadi direcziun Mustér en il stil liber. Adina puspè hai dà posts cun bavrondas, tés, paun, paun cun pèra, simplamain per mintgin insatge. Mintgin ha pudì currer sco el ha vulì, tgi pli plaun e tgi pli spert. Era ha mintgin pudì decider sez quant lunsch ch’el ha vulì currer.

Reclama per loipa Cadi e products indigens

L’intent da quest’occurrenza saja da far enconuschenta la loipa Cadi tranter Trun e Mustér, ma er da far enconuschent il sport da passlung e dasperas er far reclama per ils products dals purs indigens, di Flurin Maissen dal comité d’organisaziun. Els sajan pli che cuntents cun l’ediziun Nordic Culinaric 2019 e quai animeschia da cuntinuar er in auter onn cun quest'occurrenza sportiva e culinarica.

Ina sentupada cun ils collegas

A la partenza da Nordic Culinaric è era stà il biatlet Eligius Tambornino ch’ha per ina giada er prendì in zic pli pacific sin sia loipa da chasa. I saja er impurtant da currer magari in zic pli plaun e giudair la cumpagnia. Suenter in’emna pulit dira cun blers trenaments d’interval saja el stà leds da pudair giudair in bel di pli pacific avant ch’i giaja lura en curt als campiunadis d’Europa da biatlon a Minsk en la Bielorussia, uschia Tambornino.

RR actualitad 08:00