Avant dus onns tar il campiunadi svizzer da passlung a Steg en il Principadi da Liechtenstein ha Gianluca Cologna prendì cumià dal sport da prestaziun. Suenter otg onns en la cuppa mundiala da passlung ha il Jauer ditg adia. Gia alura era magari cler ch'il passlunghist vul cumenzar cun in studi da magister secundar.
Plaschair vi da l’instrucziun
Gianluca Cologna ha il dun da savair ir enturn cun giuvnas e giuvens. Gia durant sia carriera activa ha Cologna magari instrui a giuvnas e giuvens en il sport da passlung. U alura ha el dà vinavant sias experientschas en la loipa ad interessads durant curs da trenament. Quai ha il Jauer adina fatg fitg gugent e cun plaschair. Uschia n'era la via tar il scolast betg pli uschè lunga.
Studi a la scol'auta da pedagogia a Turitg
Suenter la carriera activa cun il punct culminant, il sprint d’equipa cun ses frar Dario tar ils Gieus Olimpics da Sotschi 2014, ha Cologna cumenzà il settember 2018 cun il studi a Turitg. Il sportist rumantsch è sa decis per Turitg, perquai che a Cuira n'èsi betg pussibel da far il studi da magister secundar. Intimà dad amis che han fatg la medema via, è Gianluca Cologna sa decis per questa citad. Suenter trais semesters sa senta il Jauer fitg bain a Turitg.
Anc adina interessà vi dal sport
Era sche Gianluca Cologna n'ha en sia vita professiunala betg pli da far cun il sport da passlung è il giuven anc adina interessà vi da quest sport. Era perquai che ses frar pli vegl, Dario Cologna, è anc adina activ, mira el qua u là ina cursa. Sez na sto Cologna, che festivescha la mesadad da mai ses trentavel anniversari, betg pli esser mintga di liber sin ils skis da passlung. El va gest uschè gugent cun ils skis u dat en il temp liber hockey. Cologna è restà polisportiv, dentant betg pli uschè fervent sco durant sia carriera sco activ.
