Gian Marco Crameri, Patrick Fischer, Raeto Raffainer, Matthias Seger u Reto von Arx e Josef Marha. Quai èn tut stars da hockey ch'han gì grondas carrieras. Tut quests stars da hockey dattan dapi in pèr onns mintgamai tar in auter club da hockey en Engiadina in gieu da legendas. Quest onn fan las legendas da hockey la visita al Club da hockey da San Murezzan. Or da l’equipa da tradiziun grischuna èn vegnids numerus stars da hockey. Gian Marco Crameri, Sandro Rizzi u er Claudio Micheli èn be in pèr nums da gronds giugaders da hockey ch’han cumenzà cun quest sport a San Murezzan. Els dattan encunter ils Old Stars and Legends. Ina equipa cun legendas sco Reto von Arx, Matthias Seger e Jonas Hiller.
Cumenzà ha tut cun in gieu da cumià
Daniel Pita da La Punt è il bab dal gieu da legendas. El ha dà 15 stagiuns cun il Cdh La Plaiv en la terza liga. A la fin da sia carriera da hockey vuleva el dar la pussibilità a ses collegas d’equipa da dar ina giada in gieu encunter legendas. Uschia ha quai dà l’emprima partida tranter in club da hockey engiadinais ed ina squadra da legendas. Davent da l’entschatta era er Raeto Raffainer, medemamain da La Punt da la partida. Uschia è naschì il gieu da legendas. Suenter il gieu a Zuoz ha quai dà gieus da legendas a Samedan ed a Zernez. Ed uss, suenter dus onns pausa pervia da la pandemia, a San Murezzan sin la plazza da glatsch da Ludains.
La finamira è da dar enavos insatge als clubs en Engiadina
Vesair numerus stars da hockey sin il glatsch a San Murezzan è insatge spezial. Cun lur gieu vulan ils stars dar enavos insatge al club ch’els visitan. Ina finamira è era da motivar giuvnas e giuvens da dar hockey e da mussar che tut è pussaivel. Enturn il gieu da legendas dat quai era la pussaivladad dad ingiantar tricots cun las suttascripziuns da las legendas. Ins po er dar sez hockey cun las legendas. E per finir datti bels premis. Il retgav dal gieu da legendas va cumplainamain a la partiziun da juniors dal EHC San Murezzan.
