La federaziun Hockey GR vul puspè vegnir pli preschenta e la marca pli ferma. E perquai vul la nova suprastanza er unir pli ferm las 19 societads che fan il mument part da Hockey GR e che dattan en differentas ligas en differents campiunadis.
Meglras premissas per giugar
Il num il pli ferm è senza dubi il Club da hockey da Tavau, ch’ha pudì festivar questa stagiun per la 31avla giada il titel da campiun svizzer. Dentant er las equipas pitschnas da la Val Poschiavo ni da Zernez duessan porscher meglras premissas per giugar a hockey. «Quels pigns clubs èn numnadamain la basa. La giogan blers giuvens hockey», uschia Joachim Cadonau. «Da manar ensemen quels è ina finamira absoluta da nus.» Ins na vegnia bain betg a far politica da club, dentant la federaziun grischuna da hockey vegnia a mirar ch'ils singuls clubs lavurian en l'avegnir pli bler e pli stretg ensemen.
Daventar l’emprima adressa
La marca la pli enconuschenta da Hockey GR è la scola da hockey da la Banca Chantunala, nua che passa 350 uffants emprendan il mument da dar hockey. Quellas scola duess er vegnir pli ferma e propi daventar l’emprima adressa per vegnir en contact cun il hockey.
In duair da surpigliar quella responsabladad
Blera lavur per Joachim Cadonau, il nov president da la federaziun Grischuna da hockey. El vesa quai dentant sco ina gronda onur i sco anteriur giugader e trenader da hockey er sco in pau in duair da surpigliar quella responsabladad.