A Sursaissa fiss il final da las cursas da skis dal Grand Prix Migros atgnamain gia istorgia. Il mars 2020 era gia tut pront en Surselva per quest spectacul, che giauda gronda reputaziun. La pandemia ed il lockdown han sfurzà da laschar svanir tut en truclet. L'enviern 2021 naginas cursas da qualificaziun ed era nagin final. Quest enviern hai funcziunà. En 11 cursas, in pau dapertut en Svizra, èn mintgamai ils 4 svelts da mintga categoria davent dad 8 fin 16 onns sa qualifitgads per il final a Sursaissa. Sonda e dumengia survegnan els la schanza da sa mesirar en duas cursas (slalom gigant e combi-race). Igl è la pli gronda cursa d'uffants e giuvenils dal mund. Il Grand Prix Migros (ch'ha cumenzà gia avant decenis sco Ovo Grand Prix) è stà la partenza per bleras carrieras en la cuppa mundiala da skis. Tranter victuras e victurs per exempel Beat Feuz, Michelle Gisin, Lara Gut-Behrami e Wendy Holdener.
In spectacul unic per la regiun
Las cifras èn impressiunantas. Ensemen cun ils 800 uffants che fan las cursas e vegnan accumpagnads da lur famiglias, quintan ils organisaturs cun da quai da 2'500 persunas en la regiun da Sursaissa-Mundaun. Economicamain e turisticamain magari attractiv da pudair emplenir anc ina giada ils letgs a la fin da la stagiun.
Era la vischnanca emprova dad esser ina buna ospitanta per restar en bella memoria a participants e participantas, visitaders e visitadras ch'arrivan or da las pli diversas regiuns da la Svizra en la Surselva. Per che tut gartegia èn 270 voluntaris e voluntarias en acziun. Dasper las cursas cun rangaziuns datti program e divertiment cun ina festa d'avertura e da finiziun.
