Siglir tar il cuntegn
cuntegn

Regiunal Gronda delegaziun rumantscha en il biatlon

Gist sis biatletas e biatlets rumantschs sa legran sin la nova stagiun da biatlon cun il punct culminant, ils campiunadis mundials l’entschatta mars ad Östersund en Svezia.

Aita Gasparin
Legenda: Ils Svizzers han lavurà a Lantsch vid ils davos detagls en vista a la nova stagiun da biatlon. Keystone

Ils Rumantschs lantschan dentant la nova stagiun cun differentas finamiras. Betg tuts pon adina ir a la partenza da la cuppa mundiala, per intgins è la tribuna la cuppa IBU, la segunda classa da cursas internaziunalas da biatlon.

Eligius Tambornino va cun nova motivaziun en la nova stagiun

Uschè ditg ch’el haja plaschair vid il biatlon e saja motivà stettia el fidaivel al sport da professiun, malgrà ch’i na saja betg ì sco giavischà ils davos onns. En il biatlon stoppian omaduas parts funcziunar per avair success, sajettar bain e currer spert. Quai di Tambornino ch’ha midà avant quatter onns dal passlung tar il biatlon.

L’anteriur spezialist da sprint ha pudì trenar bain la stad. Nova motivaziun dat er sia famiglia. Eligius Tambornino da Trun è daventà l’entschatta da l’onn bab d’ina Xenia e la stad ha el maridà.

Irene Cadurisch dovra pazienza suenter l’operaziun

La biatleta da Malögia è sfurzada da persequitar las emprimas cursas da biatlon be a l’ur da la loipa u a la televisiun. Suenter sia operaziun vid omadus pes dovri ella anc temp per puspè esser là nua ch’ella eria avant questa blessura. Cadurisch ch’ha gudagnà als davos gieus olimpics a Pyeongchang en la Corea dal Sid gist dus diploms olimpics (8. sprint e 6. staffetta) quinta dad esser enavos la fin schaner.

In dals puncts culminants per la Bregagliotta èn ils campiunadis d’Europa en la Bielorussia. Sch’i tanscha anc da pudair parter en la cuppa mundiala en questa stagiun stat anc scrit en las stailas.

Serafin Wiestner vul esser pli constant

Davos il leader da l’equipa svizra da biatlon, il Vallesan Benjamin Weger, è Serafin Wiestner quel che vess da trair il car. Il biatlet da Trin ch’ha dà ses debut en la cuppa mundiala il 2014 ha dentant gì ina stagiun passada in zic disgraziada. Tuttina ha el manchentà als gieus olimpics a Pyeongchang be per il nair da l’ungla in diplom olimpic, quai sco 9avel en il sprint. Ils resultats sur l’entira stagiun han dentant sfurzà Swiss Ski da metter enavos Wiestner dal cader naziunal en il cader A.

Il biatlet da 28 onns ha dentant pudì trenar optimal durant la stad ed è motivà per la nova stagiun nua ch’el vul esser pli constant ch’ils davos onns cun resultats regularmain en ils top 10. Mess la basa per avair success durant ils proxims mais ha Serafin Wiestner sco l’entira equipa naziunala en l’arena da biatlon a Lantsch. Tuttina sa legria el er mintgatant dastgar trenar tar el a chasa sin la loipa da Trin.

Selina Gasparin cun il spagat tranter mamma e biatleta

Mez october è la pioniera dal biatlon en Svizra, Selina Gasparin, daventada per la segunda giada mamma, quai d’ina Kiana. Dapi intginas emnas trenescha Gasparin puspè pli e pli intensiv cun la finamira da pudair far las emprimas cursas la fin schaner. Esser mamma da dus uffants e dasperas esser sportista da professiun dovria blera energia ed organisaziun, uschia Gasparin. Ma i saja er in privilegi, e questa cumbinaziun dad esser d’in maun mamma e da l’auter maun biatleta saja perfetga di l’Engiadinaisa ch’ha gudagnà als gieus olimpics da Sotschi il 2014 ina medaglia d’argient.

Als davos gieus olimpics il favrer a Pyeongchang en la Corea dal Sid hai percunter dà in debachel per la rutinada biatleta da 34 onns. Tuttina è Selina Gasparin persvadida da pudair turnar enavos uschè ferma sco avant las naschientschas da sias buobas ed uschia er puspè pudair concurrenzar cun la crème de la crème dal biatlon.

Elisa ed Aita Gasparin èn puspè saunas e motivadas

Ils davos onns n’èn betg stads simpels per las duas soras Elisa ed Aita Gasparin. Omaduas han gì difficultads cun la sanadad. Tar Elisa han ils problems dal corp schizunt cuzzà bun trais onns. Tuttina ès el vegnida da mussar in exploit als davos gieus olimpics a Pyeongchang ed ha gudagnà dus ulteriurs diploms olimpics, quai sco otgavla en la cursa singula e sco sisavla cun la staffetta svizra.

Elisa Gasparin sco er la sora giuvna Aita han pudì trenar fitg bain durant la stad, era cun ils impuls da la nova trenadra, l’Austriaca Sandra Flunger. Elisa, che surpiglia la rolla da leader en il cader svizzer suenter che la pioniera Selina Gasparin è vegnida dacurt per la segunda giada mamma, ed Aita van uschia cun gronda motivaziun e confidenza a la partenza da las emprimas cursas. Omaduas dastgan parter a las cursas da la cuppa mundiala a Pokljuka en Slovenia. Durant ch'Elisa vul lura cuntanscher in plaz en ils top 10 als campiunadis mundials il mars en Svezia, vul Aita oravant tut vegnir pli constanta e guardar da currer bain e sajettar bain en ina cursa, quai che n’è betg savens gartegià sco giavischà ils davos onns.

RR actualitad 12:00