Halla da glatsch a Tavau duai vegnir sanada

Senza renovar la halla da glatsch sto la capacitad vegnir minimada per 2’500 aspectaturs. Perquai ha la vischnanca da Tavau lantschà in project. Ella vul renovar la halla per bun 20 milliuns francs.

Visualisaziun dal stadion Bild in Lightbox öffnen.

Legenda da maletgs: Uschia duai il stadion a Tavau vesair ora il 2021. MAD

En il center stat la segirtad. Surtut vegnan engrondidas e meglieradas las pussaivladads da fugir en cas d’urgenza. Quai pretenda era l'assicuranza da bajetgs. I dat dentant midadas vi da l'entir stadion.

Per las renovaziuns ha Tavau lantschà ina concurrenza d’architectura. Quella ha il biro d’architectura Marques da Lucerna gudagnà. Il project prevesa custs da radund 22 milliuns francs. Quels duai la vischnanca da Tavau, il proprietari da la halla, finanziar.

En il futur vegni mo pli a dar in’entrada en il nord dal stadion. Tras in rintg enturn il stadion pon ils visitaders lura ir dad ina tribuna a l’autra. Plinavant datti in’ulteriura ustaria, sut la tribuna sid. La tribuna sid sezza vegn era renovada, ed ils bancs da lain vegnan remplazzads cun sezs.

Il landamma da Tavau Tarzisius Caviezel studegia il model dal stadion da glatsch. Avrir maletg en lightbox.

Legenda da maletgs: Il landamma da Tavau Tarzisius Caviezel (dretg) studegia il model dal stadion da glatsch. RTR, Ursin Lechmann

«  Nus stuein seturpegiar mintg'onn cura che nus stuein mussar als hosps las garderobas. »

Tarzisius Caviezel
landamma da Tavau

Planisà è era da sminuir ils plazs da star sin pe. Persuenter datti dapli plazs da seser. Quels portan dapli daners, ed ils plazs da star sin pe na sajan strusch ina giada occupads dal tut. La capacitad totala duai restar tar bun 6’800 aspectaturs.

A fin sin il giubileum

Sco proxim ha il parlament da Tavau, il 'Grosser Landrat', da decider la primavaira 2017. Lura vegn la fatschenta avant il suveran da Tavau che duai decider la stad 2017. Sche tut va bain, pon ins cumenzar a bajegiar il 2018. Finamira è da finir las lavurs fin il 2021. Uschia pudess ins avrir il nov stadion l'onn dal 100avel giubileum dal HCD.

RR actualitad 17:00