Suenter las ligas grondas da hockey cumenzan uss er las ligas pli bassas cun il campiunadi da hockey. En l’emprima liga frunta il HC Partenz Signuradi en l’emprima partida cunter il EHC Burgdorf. San Murezzan da la segunda liga dat l’emprim gieu encunter il HC Eisbären San Gallen.
Partenz Signuradi cun ina corifea sper la banda
Ils onns 90 eran ils onns da la VEU Feldkirch. L'equipa dal Vorarlberg dominava il campiunadi austriac. Cun il trenader carismatic Ralph Krüger ha Feldkirch gudagnà titels en seria e curunà l'era per uschè dir cun la victoria da la European Hockey League, quai è l'antecessura da la Hockey Champions League. La VEU Feldkirch era da quellas uras la meglra equipa da hockey da l'Europa.
Part da quella squadra era lura er il nov trenader dal HC Partenz Signuradi, Gerhard Puschnik. Dario Caduff, il goli rumantsch dal HC Partenz Signuradi di da ses nov trenader: «El è anc in trenader da moda veglia, senza manegiar quai en moda negativa».
San Murezzan ha engaschà Andreas Schneeberger
En segunda liga cumenza il EHC San Murezzan sco emprima equipa grischuna gia in’emna avant il termin ordinari cun la nova stagiun. San Murezzan dat cunter Son Gagl. Las autras equipas da la segunda liga han anc intgins dis temp fin che la stagiun cumenza.
Er il EHC San Murezzan va cun in nov trenader en la nova stagiun. Andreas Schneeberger ha surpiglià il post dal trenader questa stad. Ensemen cun Gian-Marco Trivella – in vegl enconuschent ch'ha sez dà circa 20 onns tar il EHC San Murezzan e che era er gia trenader da l’equipa – vegn el a manar la squadra. Quai è en sasez il pli grond midament tar il EHC San Murezzan.