Il club da hockey da Zernez è dapi onns ina valur segira en la terza liga da hockey. L’equipa engiadinaisa ha era questa stagiun puspè gudagnà la qualificaziun. Il HC Zernez ha pers da las 14 partidas da qualificaziun mo ina suletta.
Uschia dat Zernez er questa stagiun puspè partidas da promoziun encunter las meglras equipas da las autras gruppas. Era questa stagiun èn questas partidas dentant mo pli il dessert a la fin dad ina fitg buna stagiun.
Nagina ambiziun dad ir ina liga pli aut
Fertant ch'il HC Zernez è puspè stà ina liga per sasez durant la qualificaziun da la terza liga e la differenza uss tar las meglras equipas da tschellas gruppas gronda. Sco gia ils ultims onns èri fitg difficil per il HC Zernez da gudagnar partidas da promoziun.
L’emprim gieu da questa stagiun encunter il Academischer EC da Turitg ha l’equipa engiadinaisa pers cun 1:7. Il gol d’onur ha Mario Jäger fatg pir en il ultim terz. Durant la fasa da promoziun dat il HC Zernez anc encunter Pregassona Ceresio ed era encunter il HC Flem.
Uschia sco igl è per il mument resta il HC Zernez er questa stagiun en terza liga. La liga nua che l’equipa as senta gia dapi onns fitg bain.
RTR sportissimo 17:06