Il palmarès da Heidi Diethelm sa lascha vesair: Sper sia medaglia da bronz als gieus olimpics da Rio è ella vegnida era duas giadas campiunessa d’Europa cun la pistola da sport sur 25 meters.
Quai fa impressiun ed uschia è il star da la scena da tiradurs er vegnida retschavida a Mustér. Hubert Tomaschett il manader dal Tir chantunal ha beneventà ella. El ha manegià che, cura ch’els hajan vesì l’annunzia da Heidi Diethelm sajan els stads tut euforics ed èn sa legrads da quella onur. Tomaschett accentuescha che Heidi Diethelm saja l'ambassadura da sport da tir en Svizra. E ch’ina tala visita en il Grischun fetschia grond plaschair.
La sportista sezza ha manegià ch'ella haja bunas colliaziuns cun il Grischun. Sias vacanzas passentia ella a Beiva ed ella haja da sias uras fatg l'emprendissadi a Cuira. Che Heidi Diethelm è ina tiradura segira, ha ella mussà avant ils aspectaturs e las medias. Tut ses sajets èn stads da quels da 10. Da las fullas da glieud na sa lascha ella betg disturbar.RR actualitad 17:00