My Hockey League
- EHC Arosa – Düdingen 1:5
- EHC Cuira – Martigny 3:2
Per l'emprim da la tabella Arosa datti la sonda saira ina pitra terrada cunter Düdingen, cun 1:5. Gia suenter 58 secundas èn ils da Arosa vegnids en retard. Il sulet gol per Arosa ha Stefan Diezi sajettà en la 46avla minuta, al 1:3. Düdingen ha lura anc pudì marcar duas giadas, al resultat final dad 1:5 en disfavur da Arosa.
Era l'EHC Cuira è l'emprim vegnì en retard cun 0:1, en la partida cunter Martigny. Fin la 57avla minuta è Cuira lura stà cun 2:1 en avantatg. Lura ha Martigny pudì egualisar. Mo 33 secundas avant la fin da la partida gartegi dentant a Mika Burkhalter da sajettar il gol da victoria per Cuira, al resultat final da 3:2.
1. liga
- Unterseen-Interlaken – HC Partenz Signuradi 5:4
Ils Grischuns han cumenzà bain cun sajettar l'emprim gol da la partida. Suenter dus terzs è Partenz Signuradi dentant stà en retard cun 2:3. En il davos terz han ils Grischuns anc pudì scursanir duas giadas, suenter ch'ils Bernais han mintgamai sajettà in gol. Il 5:4 cunter ils Grischuns è dentant restà il resultat final.
2. liga
- EHC Schaffusa – CdH Engiadina 1:5
- Dielsdorf-Niederhasli – EHC Lai-Valbella 3:2 suenter prolungaziun
- EHC San Murezzan – Kreuzlingen 8:4
Il CdH Engiadina fa ina clera victoria cunter Schaffusa, il davos da la tabella. Suenter 13 minutas han ils Engiadinais manà cun dus gols avantatg. E sin il sulet gol da Schaffusa en la 48avla minuta, ha il CdH Engiadina pudì reagir cun dus ulteriurs gols al resultat final da 5:1 per ils Grischuns.
Lai Valbella è stà fin la 49avla minuta cun 0:2 en retard cunter Dielsdorf-Niederhasli. Ed en la davosa minuta dal temp regular han ils Grischuns perfin pudì egualisar al 2:2, e sfurzar en la prolungaziun. En la 4. minuta da la prolungaziun ha Dielsdorf-Niederhasli lura sajettà il gol decisiv al 3:2 en disfavur da Lai-Valbella.
Dètg cler pareva la partida San Murezzan cunter Kreuzlingen suenter il 4:1 per ils indigens en la 27avla minuta. Fin la fin dal segund terz han ils giasts da Kreuzlingen dentant pudì scursanir al 4:3. En il davos terz ha San Murezzan lura marcà ulteriurs gols, al resultat final dad 8:4.