Siglir tar il cuntegn

Header

cuntegn

Hockey regiunal Mamma e figlia e bab e figl en la medema squadra

Gist en duas equipas da hockey engiadinaisas dat la mamma la proxima stagiun ensemen cun la figlia ed il bab ensemen cun il figl

En Engiadina datti quest enviern ina premiera. Gist en duas equipas da hockey datti la constellaziun che la mamma dat en la medema equipa sco la figlia e ch'il bab en la medema squadra sco il figl. En la liga D da las dunnas tar il SC Schlarigna dat Patrizia Chiavi il campiunadi cun la figlia Romana. En segunda liga da hockey dat Gian-Marco Crameri cun il figl Nico.

Vis gia tut en il mund da hockey

Gian-Marco Crameri è in dals hockeyans grischuns cun il pli grond success. Crameri ch'ha lantschà sia carriera tar il EHC San Murezzan ha dà circa 700 partidas en la liga naziunala A e B. En la pli auta liga è el daventà cun trais differentas equipas campiun Svizzer. E Gian-Marco Crameri ha era fatg ina stupenta carriera en l’equipa naziunala da hockey cun esser stà da la partida tar ils Gieus Olimpics e numerusas giadas era a campiunadis mundials da hockey.

Uss en l’atun da sia carriera vegn il giugader da San Murezzan dentant anc ad ina premiera. Per l’emprima giada dat el uss ensemen cun ses figl Nico en la medema equipa.

Turnada in zichel er per dar cun la figlia

Las dunnas dal SC Schlarigna èn stadas las pionieras dal hockey da dunnas en Engiadina. Gia avant passa 20 onns han in pèr amias cumenzà cun quest sport a San Murezzan. Suenter ha l’equipa fatg midada a Schlarigna, nua che las dunnas dattan gia blers onns il campiunadi en liga B, en liga C, e dapi la stagiun passada era en la liga D da las dunnas.

Ina da las pionieras è er Patrizia Chiavi da Samedan. Suenter la pausa da famiglia è la hockeyana turnada sin il glatsch. Uss ha er ella la pussaivladad da dar per l’emprima giada cun sia figlia Romana. Tar las mattas èsi pussaivel da dar gia cun 14 onns en l’emprima squadra. Cura che Romana ha gì cuntanschì quella vegliadetgna, ha ella tschiffà l’occasiun e dat uss ensemen cun la mamma en l’emprima equipa da Schlarigna.

RTR actualitad e sport 17:00

Artitgels legids il pli savens

Scrollar a sanestra Scrollar a dretga