Duas giadas han ils gieus olimpics d’enviern gì lieu en Svizra. Il 1928 ed il 1948 a San Murezzan nua che l’equipa naziunala da hockey ha mintgamai gudagnà la medaglia da bronz. Sin il glatsch dasper l'hotel Kulm, en il Kulm Park è vegni dà il turnier olimpic da hockey.
90, respectivamain 70 onns suenter ils turniers glorius da la naziunala svizra da hockey a San Murezzan reviva sin il glatsch dal Kulm la gloria da pli baud. Durant la posa dals gieus olimpics datti in turnier internaziunal sin il terrain istoric. Durant l'All Saints Cup a San Murezzan cumbattan Lugano, Kloten, Pilzen da la Tschechia e München per il titel.
Il turnier a San Murezzan dess regurdar al turnier olimpic
Il success da l’equipa naziunala da hockey ha in stretg connex cun l'EHC San Murezzan. L’entschatta eran ina buna part da l’equipa naziunala giugaders da San Murezzan. Surtut Richard «Bibi» Torriani era durant blers onns in dals giugaders ils pli impurtants da l’equipa naziunala. Tar il turnier olimpic l’onn 1928 ha Bibi Torriani fatg cun mo sedesch onns l’emprima giada furora en l’equipa naziunala.
RR actualitad 08:00