Ina culissa da passa 1'200 aspectaturs ed aspectaturas han persequità il mardi saira la partida decisiva da quest mezfinal tranter Arosa e Bellinzona. Ils d'Arosa avevan manà en la seria dal mezfinal cun 2:0, cun gudagnar las duas davosas partidas aveva Bellinzona dentant pudì egualisar.
En la tschintgavla partida va Arosa en avantatg en la 13avla minuta. Fin la fin dal segund terz na datti nagins ulteriurs gols. Gist al cumenzament dal davos terz nizzegian ils d'Arosa lura ch'els han in um dapli sin il glatsch, e marcan il 2:0. Cun sajettar dus ulteriurs gols en la 46avla ed en la 51avla minuta, fa il EHC Arosa lura tut cler.
In final dals megliers
Uss fruntan las duas meglras squadras da la stagiun regulara in sin l'auter, en il final dals playoffs da l'emprima liga, gruppa ost. L'emprima partida tranter Arosa e Wetzikon è gievgia che vegn.
RR novitads 23:00
