Sco adina durant las davosas stagiuns cumbatta il Cdh Engiadina era questa stagiun puspè cun la relegaziun. L’equipa da l’Engiadina Bassa ha bain gudagnà l'entschatta da la stagiun ils trais gieus encunter Son Gagl, Lai ed Urdorf. Dapi quellas victorias spetga l’equipa dentant sin ils proxims puncts. Pervi dad ina seria da sis sconfittas è l’equipa puspè crudada sut il stritg sin ina plazza da relegaziun.
Per il mument na faschain nus betg gols
Per turnar sur il stritg sin ina plazza da playoff ed uschia esser segir da pudair restar en la segunda liga dovri puncts. La pli gronda schanza da gudagnar puspè in ni l’auter punct ha l’equipa durant las proximas trais emnas. Lura s’entaupa l’equipa cun ils adversaris Son Gagl, Lai ed Urdorf. Quai èn quellas equipas che il Cdh Engiadina ha gia batti en l’emprima mesadad dal campiunadi.
In problem è segir che nus na avain betg golis che treneschan cun l’equipa
La situaziun ch'il goli dal Cdh Engiadina na viva betg en la regiun e po perquai be trenar avant ils gieus cun l’equipa n'è segir betg ideala. Savens ha l’equipa da trenar cun il goli da juniors, u perfin senza in goli. Quella situaziun è difficila e na sa laschia per il mument betg midar. L’equipa veglia ussa dentant puspè mussar las medemas prestaziuns encunter ils proxims adversaris sco gia il november. Lura duessi tanscher per l’equipa da l’Engiadina Bassa.
RR Sportissimo 17:00