Il glatsch en halla Gurlaina a Scuol ha propi ars sonda saira. Ina partida dira, intensiva e cun bleras emoziuns tranter il CdH Engiadina ed il club da hockey da Bellinzona. En il segund gieu d'otgavel final dals playoffs en secunda liga, vegnan ils Engiadinais d'egualisar la seria sin 1:1. Il CdH Engiadina batta ils gronds favurits da Bellinzona e victurs da la qualificaziun gist cun 4:1.
Insumma ha il club d'Engiadina Bassa, ch'ha terminà la qualificaziun sco otgavels e gist anc pudì en ils playoffs, dominà ils emprims dus terzs dal gieu. En l'ultim terz han ils da Bellinzona fatg dapli squitsch ed ils Engiadinais incassà blers chastis. Fin la fin è la victoria tuttina clera e tut è puspè avert en quella seria d'otgavel final tranter il Cdh Engiadina e Bellinzona.
San Murezzan ha pers
En la segunda liga ha l'EHC San Murezzan pers il gieu da playoff ordaifer cunter il HC Seetal cun 4:7. En la seria è San Murezzan en retard cun 0:2.
En l'emprima liga ha il Club da hockey Partenz/Signuradi gudagnà ordaifer cunter ils Pikes Oberthurgau cun 4:2.
L'EHC Arosa ha medemamain gudagnà ordaifer, quai gist cun 9:3 cunter l'SC Rheintal. La victoria n'è maina stada periclitada. Suenter 2/3 manavan ils Grischuns gia cun 7:0.
RR novitads 20:00