Siglir tar il cuntegn

Header

Navigaziun

Exponents dal CdH Engiadina.
Legenda: Oldrich Jindra (amez) na trenescha betg pli il club engiadinais. RTR, Reto Mayer
cuntegn

Hockey regiunal CdH Engiadina sa separa da ses trenader Oldrich Jindra

L’era dad Oldrich Jindra sco trenader dal club da hockey Engiadina va a fin.

Suenter quatter onns ha il club che dat en segunda liga da hockey desditg il contract cun Jindra per la fin da zercladur. Gia durant la stagiun passada avevan ils responsabels da l’equipa da l’Engiadina Bassa midà il contract cun il trenader dad in contract limità en in contract betg limità. Cun tegnair en il temp da trais mais è il contract uss vegnì desditg.

Betg pli vesì potenzial da svilup

Suenter la stagiun ch'è ida a fin avant paucas emnas ha la suprastanza dal club da hockey d’Engiadina analisà la situaziun e constatà ch’i na dat betg pli potenzial da svilup cun il trenader Oldrich Jindra. Per quest motiv ha l’equipa desditg il contract cun ses trenader. Sut la batgetta da Jindra è il CdH Engiadina turnà suenter in onn en terza liga puspè en segunda liga. Cun Jindra a la banda è il CdH Engiadina sa qualifitgà durant las ultimas duas stagiuns per ils playoffs.

Successur anc betg enconuschent

Segir è che il successur dad Oldrich Jindra sco trenader dal CdH Engiadina na vegn betg or da la famiglia dal CdH. La suprastanza è actualmain vi da l’evaluaziun dals davos detagls. Il num dal nov trenader duess alura vegnir enconuschent las proximas emnas.

RR novitads 20:00