Il CdH Engiadina ha cumenzà bain il nov campiunadi. L’equipa da hockey da la segunda liga ha gudagnà trais partidas en roda ed ha uschia ramassà puncts impurtants en il cumbat da relegaziun. Grazia a la seria da victorias è il CdH Engiadina sin ina plazza en il champ d’amez da la tabella. L’avantatg sin il stritg importa otg puncts.
Ils giugaders giuvens èn vegnids pli madirs, els han dapli experientscha.
La gronda differenza tar la stagiun vargada è, ch'il CdH Engiadina gudogna uss las partidas cunter adversaris ch'èn pli flaivels sin il palpiri. Grazia a quels success è l’equipa da l’Engiadina Bassa stada buna da sa distatgar dal stritg.
Sch'i gira, alura giri. L’equipa vegn en in ritmus da gudagnar e lura vai quasi da sez.
Pervia ch'il CdH Engiadina ha gudagnà las davosas trais partidas, avess l’equipa gugent cuntinuà subit cun il campiunadi. Per l’equipa da l’Engiadina Bassa cuntinuescha il campiunadi dentant pir ils 4 da november cun la partida cunter Kreuzlingen. Tranteren spetga anc ina partida da qualificaziun per la cuppa Svizra da la stagiun che vegn.
RR actualitad 17:00