En la MySports League ha l'EHC Cuira pers ordaifer cunter l'SC Lyss cun 1:2. En l'emprim terz n'han las dus equipas sajettà nagins gols. Suenter manava Lyss adina la partida. Als Grischuns è lura anc gartegià il gol d'onur otg minutas avant la fin. Ed era Arosa sto magunar ina terrada. Il club ha pers a chasa cunter EHC Wiki-Münsingen cun 2:3.
Resultats MySportsLeague
En l’emprima liga ha il HC Partenz-Signuradi pers en l’emprima runda dal campiunadi ordaifer cunter ils Pikes Oberthurgau cun 3:5. Ils Pikes èn ids gia suenter 12 minutas cun l’emprim gol en avantatg. L’emprim gol per ils Partenzers ha Yves Carnot sajettà en la 35avla minuta – cura ch’i steva 4:0 per ils Turgovians. En la 51avla minuta èsi anc gartegià al HC Partenz da scursanir sin 3:4. Suenter han lura dus gols dals Pikes Oberthurgau decis la partida definitivamain.
Ed era en la segunda liga ha San Murezzan pers ordaifer cunter Bassersdorf cun 4:5. Il gieu per ils Engiadinais ha cumenzà bain cun il gol dad Armon Niggli en la terza minuta. Era en il segund terz era la partida egualisada. Ella è ida a fin cun in 2:2. Anc fina 12 minutas avant la fin dal gieu stevi 4:4. Il gol decisiv ha lura Bassersdorf sajettà en la 49avla minuta. Il gieu tranter il Club da hockey Engiadina e Illnau Effretikon è vegnì interrut cura ch'i steva 1:1.
