Siglir tar il cuntegn

Header

cuntegn

Cultura da fans EHC Cuira Fitg diversa ed unica en la MySports League

Ils fans da l'EHC Cuira èn organisads en differentas gruppas. La sonda vargada èn els s'entupads tar in'occurrenza speziala.

La sonda passada èn radund 40 fans da l'EHC Cuira sa rimnads tar lur stadion da glatsch a l'Obere Au. Quai per beneventar il giugader dal rival EHC Dübendorf, Steven Widmer, a Cuira. Tge? Gea, vus avais legì correct.

L'attatgader Widmer è in giugader che polarisescha en la MySports League, in che tschertga la provocaziun. Uschia hai dà pliras giadas talas cun ils fans da l'EHC Cuira en il passà. Ma quella relaziun è vegnida meglra, in zichel tar in «amur-odi». Ils fans da Cuira enconuschan Widmer, e lez ils fans da Cuira:

Ins sto schon ir lunsch a tschertgar enfin ch'ins chatta ina cultura da fans en il sport d'amaturs sco qua tar l'EHC Cuira.
Autur: Steven Widmergiugader EHC Dübendorf

Cunquai che Widmer ha dacurt pers in patg cunter ils fans da Cuira ha el stuì ir cun velo da Dübendorf fin a Cuira. Là è el vegnì retschavì dals fans cun applaus. Quai è mo in'anecdota che demussa quant activ ch'ils fans da l'EHC èn.

Cultura da fans: Unica e diversa

En la MySports League (terz'auta liga en Svizra) saja la cultura da fans da l'EHC Cuira unica. Quai manegian almain ils fans da l'EHC. I dettia bain singulas gruppaziuns, sco d'Arosa, Basilea u Lyss, ma cun la scena da Cuira vegnian er quellas equipas betg da tegnair cun.

Ils fans èn in dals gronds motivs daco che jau sun uss qua uschè ditg.
Autur: Lele Sarkisgoli EHC Cuira dapi 2012/13

Interessant vid la cultura da fans da l'EHC Cuira è segiramain, co ils fans èn organisads. I dat numnadamain betg mo in fanclub tar quel tuts fan part, mabain differentas uniuns/gruppaziuns:

  • Fanclub EHC Cuira (ca. 200 commembers): responsabels per choreografias, fanshop e viadis cun car als gieus ordaifer
  • EHC Fans (8 commembers): responsabels per la lavur redacziunala (p.ex. pre-/post-gieu rapports, videos, fotografias); fitg activs
  • Bock uf EHC (ca. 50 commembers): fan bler lavur voluntara (p.ex. mainan la bar da la festa da la citad, u pli baud la bar Schmalspur en la citad veglia); il retgav va en favur dal club
  • KHUR33: ina sort gruppaziun da donaturs, cumpran l'abo da stagiun per in pretsch simbolic, daners van a l'emprima equipa; «sponsurs privats»

RTR actualitad 08:00