Siglir tar il cuntegn

Header

Navigaziun

cuntegn

Hockey regiunal EHC Arosa è campiun en l'emprima liga regiunala

Cun la terza victoria en seria en il final da l’emprima liga encunter il EHC Wetzikon daventa igl EHC Arosa il nov campiun d’amaturs da la Svizra da l’Ost.

Ils giugaders dal EHC Arosa festiveschan lur victoria
Legenda: Arosa gioga a partir da proxima stagiun en la MySports League. RTR, Andreas Wieland

Avant passa 1’500 fans en il center da sport e congress ad Arosa ha l’equipa grischuna battì Wetzikon cun 5:3 ed uschia decidì la seria da final cun 3:1 (best-of-five). Sco gia en il davos gieu da final èsi stà in dir cumbat tranter Arosa e Wetzikon, il victur da la qualificaziun, quai cun la meglra fin per il club grischun da tradiziun ch’ha procurà per la decisiun cun il 5:3 en la 52avla minuta. Cunquai gartegia al club d’Arosa er da far revantscha per la terrada encunter Wetzikon en in final da l’onn passà (0:3).

Sco davos obstachel per daventar campiun svizzer en l'emprima liga spetga ussa en il final il SC Lyss ch’ha triumfà en l’emprima liga da la Svizra Romanda. Definitiv è dentant ch’il EHC Arosa dat a partir da la proxima stagiun en ina liga pli auta, pia en la MySports League. Uschia vegni durant la stagiun 2019/2020 era tar il derbi grischun tranter Arosa ed il EHC Cuira ch'è mitschà quest onn be piz a cup da la relegaziun.

RR novitads 06:00