EHC Cuira – partenza en nova emprima liga superiura

Dapi questa stagiun datti ina nova liga da hockey. Tranter l’emprima liga e la Swiss League è vegnida creada l’emprima liga superiura.

Hockeyans. Bild in Lightbox öffnen.

Legenda da maletgs: Il club da hockey da Cuira è pront per la nova stagiun. MAD

Nova sfida per il club da hockey da Cuira: Suenter diversas stagiuns en l'emprima liga ha la meglra equipa grischuna dad amaturs fatg il pass en l'emprima liga superiura. La nova liga è vegnida stgaffida en vista a la nova stagiun e duess manar equipas ambiziusas anc pli datiers a la liga naziunala. Las quatter meglras equipas da las trais gruppas, ost, central e vest, èn vegnias unidas en l’emprima liga superiura.

Nov campiunadi cun adversaris enconuschents

En il campiunadi da l’emprima liga superiura s’entaupa l'EHC Cuira sco fin da qua cun Dübendorf, Bülach e cun Seewen, ma er cun novs adversaris sco Brandis, Wiki Münsigen, Sion e Neuchâtel. Il nivel, la qualitad ed era il tempo savessan esser anc pli intensiv sco fin qua en emprima liga.

«  Igl è adina la finamira da remplazzar giugaders che bandunan l’equipa cun giugaders anc pli ferms. »

Marcel Habisreutinger
Trenader EHC Cuira

L'EHC Cuira parta en il nov campiunadi cun in'equipa fitg differenta a quella da la stagiun passada. Quasi diesch giugaders èn novs. Ils responsabels da Cuira emprovan natiralmain da sa participar cun ina equipa cumpetitiva al nov campiunadi. Quant lunsch ch'i tanscha mussan alura ils gieus.

RR actualitad 11:00