Siglir tar il cuntegn

Header

Ina scena d'in gieu da hockey regiunal.
Legenda: Ina scena d'in derby EHC San Murezzan cunter CdH Engiadina dal 2018. RTR, Georg Luzzi
cuntegn

Hockey regiunal EHC San Murezzan gudogna emprim derby engiadinais

Il derby tranter las duas squadras engiadinaisas è stà l'emprim gieu da la stagiun da hockey en segunda liga. Ed a Scuol vegnan ils da San Murezzan la finala tar in 3:0 cunter il CdH Engiadina.

Il EHC San Murezzan è ì en avantatg suenter 5 minutas tras il gol dad Luca Bassin. Il 2:0 ha marcà Fabio Mercuri en la 47avla minuta. Decidì il gieu ha finalmain Harrison Koch cun il 3:0 en la 58avla minuta.

Bleras minutas e discletg per Tichy

Ils dus arbiters dal derby engiadinais han adina puspè gì da baltgar la situaziun sin il glatsch cun dar minutas. La squadra d'Engiadin'Ota ha da desister il proxim temp sin Jan Tichy. L'attatgader ha rut ina chanvella.

Lai-Valbella cumenza cun ina terrada

Ordaifer cunter Illnau-Effretikon perda il EHC Lai-Valbella cun 1:3. Passa 30 minutas han ils Grischuns tegnì in 0:0. A la fin dal segund ed al cumenzament dal davos terz ha Illnau-Effretikon lura sajettà trais gols. Il sulet gol per Lai-Valbella è lura crudà en la 55avla minuta.

En la MySports League gudogna il EHC Cuira a chasa cunter Wiki-Münsingen cun 5:1. Fin ina minuta avant la fin da la partida, manava Cuira sulet cun 2:1. En paucas secundas èn anc crudads trais ulteriurs gols per ils Grischuns.

Arosa perda era sia segunda partida da la MySports League, questa giada cun 1:3 ordaifer cunter Martigny. A la fin da l'emprim terz steva la partida anc pari 1:1.

En l'emprima liga perda Partenz-Signuradi ordaifer cunter Burgdorf gist cun 1:6. En la 31avla minuta gartegia als Grischuns l'emprim gol al 1:2, dentant las duas proximas minutas marcan ils da Burgdorf grad dus gols al 1:4. Ed en il davos terz incassescha il HC Partenz-Signuradi dus ulteriurs gols al resultat final da 1:6.

RR novitads 23:00