La stagiun passada è stada la stagiun da giubileum da l’equipa da las dunnas dal Cdh Engiadina, da las «Chicas», sco quai che l’equipa vegn era anc numnada. Dapi diesch onns dat la squadra campiunadi en liga naziunala C, quai è la terz auta liga da hockey da las dunnas en Svizra.
La stagiun passada han las dunnas dal Cdh Engiadina terminà sin plaz trais. Sportivamain è quai segir stà in success. Problematic è dentant la situaziun da persunal tar l’equipa. Be tredesch, quattordesch giugadras stattan a disposiziun.
Collavuraziun cun equipa da dunnas da Schlarigna
Pervia da la mancanza da giugadras han ins cumenzà ina collavuraziun cun la segunda equipa da hockey da dunnas en Engiadina, cun il SC Schlarigna. L’equipa da l’Engiadin'Ota ha fatg la stagiun passada il pass enavos en liga D.
Il Cdh Engiadina dat campiunadi en liga C, uschia è ina collavuraziun fitg bain pussaivla. Las duas equipas barattan sche adina pussibel las giugadras tranter dad ellas. Fin da qua ha Schlarigna dentant gidà dapli ad Engiadina che viceversa.