Per il club da hockey Partenz-Signuradi hai dà la dumengia l’emprima victoria da la stagiun. Cunter il EHC Wetzikon gudogna la suletta squadra grischuna en l’emprima liga suenter prolungaziun cun 5:4. Cun dus puncts suenter duas partidas sa chatta Partenz-Signuradi sin plazza 9 da la tabella.
Tabella 1. Liga
Terradas per Cuira ed Arosa
La quarta runda da questa stagiun en la MySports League n'è betg stà ina per las squadras grischunas. Il EHC Cuira ha pers ordaifer cunter il EHC Dübendorf cun 1:5. Quai malgrà ch'ils Cuira Capricorns èn ids en avantatg cun 1:0 suenter 4 minutas entras in gol da Cyrill Bischofsberger. Be duas minutas pli tard è Dübendorf dentant gia vegnì d'egualisar – a la fin è sa resultà ina clera terrada dad 1:5.
Er l'EHC Arosa sto magunar in'ulteriura terrada. Cunter l'EHC Seewen perda Arosa cun 4:5 suenter prolungaziun. La squadra d'Arosa dastga dentant esser cuntenta, èsi bain l'emprim punct da la stagiun en la MySports League. Suenter quatter rundas sa chatta Arosa dentant cun 1 punct a la cua da la tabella.
Tabella MySports League
Segunda liga
Er per il EHC San Murezzan hai dà ina terrada. La squadra engiadinaisa ha pers ordaifer cunter EV Dielsdorf-Niederhasli cun 5:6 suenter prolungaziun. Igl è stà in si e giu per San Murezzan. Bain han ins pudì ir en avantatg cun 2:0 suenter 11 minutas – alura ha San Murezzan dentant survegnì gist 5 gols fin la 41avla minuta. Ma la squadra engiadinaisa è anc ina giada vegnida da sajettar 3 gols ed ha uschia cuntanschì la prolungaziun. Là ha dentant il EV Dielsdorf-Niederhasli pudì sajettar il gol decisiv al 5:6.
Ina victoria hai dà per il Club da Hockey Engiadina. A chasa ha Engiadina gudagnà cunter il EHC Dürnten Vikings cun 4:3. Quai malgrà che il CdHE era fin la 55avla minuta èn dischavantatg cun 2:3. Entras dus gols da Alfons Mayolani e Nigel Stecher entaifer 90 secundas èn ils Grischuns vegnì da tegnair ils 3 puncts a chasa.
Ina clera terrada hai dà per il EHC Lai-Valbella. Ils da Lai han pers a chasa cunter il EHC Wallisellen cun 0:6 e sa chattan vinavant a la cua da la tabella. Quai cun duas terradas ord duas partidas.
Tabella 2. Liga
RR novitads 20:00