En la MySports League ha il EHC Cuira incassà ina ulteriura terrada. A chasa han ils hockeyans da Cuira pers cunter Huttwil la 5avla runda da qualificaziun. L'emprim gol ha il EHC Cuira fatg en la 8avla minuta. Silsuenter ha Huttwil anc pudì far dus gols en l'emprim terz, e dus en il segund terz.
Huttwil n'ha enfin uss pers nagina partida ed è a la testa da la tabella. Il EHC Cuira ha sulet gudagnà ina da tschintg partidas ed è sin il segund davos plaz da la tabella.
Resultats MySportsLeague
La suletta victoria per in club da hockey grischun en la segunda liga regiunala po Lai-Valbella festivar questa saira. Lai-Valbella ha gudagnà a chasa cunter Dielsdorf-Niederhasli e quai gist cun 4:1. Il sulet gol ch’ils da Dielsdorf-Niederhasli han fatg è gia ì suenter 25 secundas en la rait. Lai-Valbella è uss cun 6 puncts sin il terz plaz da la tabella e quai cun avair giugà trais gieus.
L'EHC San Murezzan ha pers ordaifer cunter l’EHC Dürnten Vikings cun 2 a 3. Suenter il segund terz manava San Murezzan anc cun 1 a 0. En l'ultim terz han ils Vikings dentant pudì volver la partida.
Er l’auter club engiadinais, il Club da Hockey Engiadina ha pers ordaifer cunter Kreuzlingen-Konstanz cun 3 a 5. En il segund terz han ils Engiadinais stuì incassar gist 4 gols.