Siglir tar il cuntegn

Header

Il Cdh Engiadina resta en 2. liga
Legenda: Il Cdh Engiadina resta en 2. liga RTR, Roman Dobler
cuntegn

Hockey regiunal Il Cdh Engiadina resta en segunda liga

Ina partida avant la fin da la relegaziun ha il Cdh Engiadina fatg tut cler. L’equipa da l’Engiadina Bassa ha battì Lai Valbella cun 9:1 e resta en segunda liga.

Mo per trais puncts ha il Cdh Engiadina manchentà durant questa stagiun ils playoffs. Enstagl da cumbatter per il titel ha l’equipa stuì ir la via sur la relegaziun, e segirar uschia in plaz en la segunda liga. Il Cdh Engiadina è parti fitg bain en la fasa decisiva dal campiunadi. Gist las emprimas trais partidas ha l’equipa gudagnà. Uschia ha l’equipa gì la dumengia passada l’emprima balla da matsch per far tut cler e per segirar in plaz tranter las diesch equipas da la segunda liga. Cunter Rapperswil Jona ha il Cdh Engiadina dentant manchentà questa schanza.

Fatg tut cler cunter Lai Valbella

Forsa er in zichel cun la gritta en il venter ha il Cdh Engiadina dà la partida cunter Lai Valbella e qua n’ha ha la squadra dal trenader ad interim Jon Peder Benderer fatg nagins regals. Suenter l’emprim terz manava Engiadina cun 1:0, suenter il segund gia cun 6:0. Suenter quaranta minutas era il gieu decis. Cun la clera victoria cunter Lai Valbella èsi cler che Engiadina po dar er la proxima stagiun en segunda liga. L’ultima partida da relegaziun il venderdi saira cunter Chiasso è mo pli per la statistica.

Emprima liga

En l'emprima liga ha Partenz Signuradi pers la partida cunter ils Red Lions Reinach cun 3:4. En la fasa da relegaziun è Partenz Signuradi ussa sin il segund plaz.

RTR novitads 06:00