Siglir tar il cuntegn
Inhalt

Hockey regiunal Il siemi dal titel da campiun svizzer è puspè realisabel

La squadra da juniors dal EHC San Murezzan ha la schanza da daventar champiun svizzer en la liga da juniors Top. L'ultima giada è quai reussì a la squadra engiadinaisa avant 16 onns e la penultima giada avant 42 onns.

La squadra da juniors da San Murezzan 2016 / 2017.
Legenda: La squadra da juniors da San Murezzan 2016 / 2017. mad

Ils juniors da San Murezzan giogan dumengia proxima l'ultim gieu da la stagiun en lur liga encunter Meyrin ed han anc adina la schanza da gudagnar il titel da champiun svizzer da quest onn. Per il EHC San Murezzan fiss quai ina victoria bainvesida che sa repetiss per la segunda giada en l’istorgia dal club che ha 99 onns.

Del Curto, Triulzi....

La squadra da juniors – quella giada en la liga da «inter-juniors» – aveva cuntanschì il titel ils 2 da mars 1975. La partida encunter Martigny aveva lieu sin glatsch neutral a Wallisellen. Ils engiadinais han gudagnà il matsch cun 11:3.

Da la partida en la squadra eran nums ch’ins ha udì anc plirs onns suenter en connex cun il sport da hockey, per exempel Arno Del Curto, Marco, Giorgio ed Enrico Triulzi, Claudio Raffeiner u Alberto Rogantini.

Legende: Video Il gieu decisiv l'onn 1975 abspielen. Laufzeit 07:59 Minuten.
Or da RTR dals 03.03.2017.

Basa per ina carriera internaziunala

Per blers dals giugaders da quella giada ha il titel da champiun svizzer avri ina porta sin il martgà da hockey, ha declerà Andreas Duschletta – alias Mac – cun sfegliar en la documentaziun dal gieu decisiv. Suenter la victoria encunter Martigny hajan plirs giugaders bandunà il EHC San Murezzan per far carriera.

Ideal per palmarès d’in hockeyaner

Ils juniors da la squadra actuala da San Murezzan hajan uss il fieu e la voluntad da gudagnar la mastranza, uschè Rolf Camichel, il co–trenader da la squadra Juniors Top.

Ed ina victoria signifitgass er in nov schlantsch per tut l’organisaziun dal EHC San Murezzan, suenter che la prima squadra (gioga en la segunda liga) è crudada or dals playoffs anticipadamain.

Cumbatter per mintga punct

La fin d’emna passada n'ha la squadra da San Murezzan betg anc ragiunt la victoria dal titel da champiuns svizzers cun la runda dubla ord chasa. La sonda ils 4 da mars ha San Murezzan battì Genève Futur Hockey cun 4:3. La dumengia ils 5 da mars percunter han ils juniors da San Murezzan pers cun 5:8 encunter Meyrin.

Il gieu decisiv è perquai uss ils 12 da mars, puspè encunter il CP de Meyrin, lura a chasa a San Murezzan.