L’EHC Cuira ha cumenzà cun success l’onn nov. Il club da la chapitala grischuna ha gudagnà il derbi grischun ordaifer encunter l’EHC Arosa cun 4:0.
Sco gia mez december ha l’equipa dal Scanvetg er pers il segund gieu da chasa encunter il vischin e rival da Cuira ch’è stà oravant tut pli effizient cun sajettar gols ch’ils d’Arosa. Gia en l’emprim terz han Ron Fischer en la 7avla minuta ed Andreas John en la 20avla entras in gol da powerplay manà l’EHC Cuira sin la via da success. Per la decisiun ha Luca Schommer procurà cun il 3:0 en la 29avla minuta. Paucas secundas avant la fin dal gieu ha Yanick Sablatnig anc tuc en il gol vit al 4:0.
Grondas emoziuns
In gieu fitg emoziunal èsi stà en l’emprim terz cun chastis tut a dubel. Tranter auter ha l’attatgader da Cuira, Cedric Sieber, survegnì en la 5avla minuta in chasti disciplinar uschia ch’el ha stuì ir gia baud sut la duscha. Quai n’ha dentant betg bittà ils da Cuira ord il concept. Grazia a questa terza victoria en il quart duel cun Arosa en questa qualificaziun ha l’EHC Cuira uss suenter 24 rundas da campiunadi tuttina bler puncts sin il conto sco Arosa.
Resultats MySports League
En l'emprima liga ha Partenz-Signuradi pers ordaifer cunter l'emprim da la tabella, l'EHC Frauenfeld, cun 1:5. Ils da Partenz restan uschia sin il penultim plaz cun 14 puncts.
En la segunda liga ha Lai-Valbella gudagnà il derbi grischun cunter il Club da Hockey Engiadina cun 4:2. Quai suenter ch'ils Engiadinais manavan il gieu anc fin trais minutas avant la fin.
L’EHC San Murezzan ha gudagnà a chasa cun 5:2 cunter l’EHC Wallisellen. Ils hockeyans engiadinais han gì d’emprim ennà la partida sut controlla. Gia suenter otg minutas manavan els cun 2:0 cunter ils giasts.
En il segund terz èsi lura gartegià als da Wallisellen d’egualisar il gieu.
Cun ils trais gols da San Murezzan en l’ultim terz è lura tut stà cler.
Suenter 16 partidas sa chatta San Murezzan cun 23 puncts sin la tschintgavla posiziun da la tabella.
RR novitads 20:00+