Siglir tar il cuntegn

Header

cuntegn

Regiunal Impurtanta victoria per l’US Schluein Glion

Suenter 4 gieus senza victoria ha l’equipa da ballape da Schluein Glion finalmain puspè pudì gudagnar trais puncts en la 2. liga regiunal. L’US Schluein Glion ha battì a chasa il FC Rebstein cun 1:0.

Il sulet gol ha sajettà Luca Vinzens en la 56avla minuta. Per Schluein Glion èsi in’impurtanta victoria en il cumbat cunter la relegaziun. Malgrà ils trais puncts gudagnads resta l’equipa sursilvana sut il stritg da la tabella. Per in plaz sur il stritg manca ussa dentant sulet pli in punct.

3 puncts senza persvader

L’US Schluein Glion n’ha betg engulà la victoria, mo ils da Schluein n’han er betg briglià. Oravant tut avant la pausa ha Schluein Glion giu tant sco naginas schanzas da gol. Ed er a la fin dal gieu èn ils Sursilvans mitschads cun in egl blau suenter che Rebstein ha giu gest pliras bunas schanzas d’egualisar il gieu.

Per l’US Schluein Glion èsi stà pir la quarta victoria en la 17avla runda da campiunadi e l’emprima victoria da chasa dapi l’emprima runda. Mez avust 2015 aveva Schluein Glion battì a chasa Triesen cun 4:1.

Cuira cun proxim pass direcziun promoziun

A la testa da la tabella en la 2. liga resta Cuira 97. L’equipa da la chapitala grischuna ha gudagnà ordaifer encunter il FC Triesen cun 5:1. Cuira maina 5 rundas avant la fin dal campiunadi cun in avantatg da 5 puncts sin il FC Weesen.

Artitgels legids il pli savens