Impurtantas victorias per Schluein Glion e Domat

Entschatta gartegiada en la runda da primavaira per l'equipa da Schluein Glion e per l'equipa da Domat en la segunda liga regiunala da ballape. Omaduas equipas da segunda liga ha gudagnà lur gieus.

logo ballape regiunal Bild in Lightbox öffnen.

Legenda da maletgs: Schluein Glion e Domat han recaltgà impurtants puncts en il cumbat cunter la relegaziun. RTR

Schluein Glion ha gudagnà sonda saira a chasa cunter il terz da la tabella, St. Margrethen cun 3:1 ed ha uschia recaltgà impurtants 3 puncts en il cumbat cunter la relegaziun. Al cumenzament eran ils da Schluein anc enavos cun 0:1, èn lura dentant anc vegnids da volver il gieu.

Grazia a quella victoria, ha Schluein Glion pudì sa distanziar in pau dal stritg. L’equipa dad Urs Casutt è da nov sin l’8avel plaz cun ina reserva da 5 puncts sin il stritg.

Domat batta Diepoldsau-Schmitter cun 1:0

In’impurtanta victoria hai era dà per la segunda equipa grischuna en segunda liga. Il club da ballape da Domat ha gudagnà ordaifer cunter Diepoldsau-Schmitter cun 1:0. Domat è uschia da nov sin il 10avel plaz, pia gist sut il stritg. A la testa resta l’equipa da Buchs.

La proxima runda è lura la proxima fin d’emna. Domat dat la sonda encunter Weesen e Schluein Glion lura la dumengia a Montlingen.

RR Sportissimo 12:00