Siglir tar il cuntegn

Header

Ina giuvna skiunza.
Legenda: Elena Stucki è ina skiunza che ha sias finamiras. RTR, Georgina Janki
cuntegn

Ina giuvna cun grond potenzial Elena Stucki fila vid sia carriera

Dacurt ha Elena Stucki gudagnà la medaglia da bronz en il super-G dal campiunadi svizzer dals U16. Cun quest podest è ella stada la megliera skiunza grischuna.

Skiunzs e skis, cun ina sutgera davostiers.
Legenda: A la partenza da las cursas naziunalas U16 a Breil-Vuorz-Andiast. RTR, Georgina Janki

Elena Sanna Stucki da Flond ha 15 onns ed è da preschent en il ravugl da las meglras diesch skiunzas svizras en la seria da las cursas naziunalas U16. Ella fa la scola da talents a Glion ed è l'emprim onn en il cader da la Federaziun grischuna da skis BSV. Il trenader dal BSV Albi Egger attestescha grond potenzial a la giuvna Sursilvana. Elena haja en quest emprim onn en il cader da la federaziun grischuna fatg in grond svilup. Ella saja bain structurada ed organisada e surtut tecnicamain lunsch per sia vegliadetgna.

En 5 u 6 onns en in cader da Swiss-Ski

Sche Elena possia trenar bain vinavant, senza blessuras, e restar tranter las meglras da sia annada en cursas naziunalas, crai Albi Egger ch'il pass en in cader naziunal da Swiss-Ski è realistic e pussaivel. Per in giuven atlet èn ils onns tranter 15 e 20 decisivs. I vegn pretendì bler dad els cun skis, cursas, trenaments e scola. Elena Stucki fa proximamain ils examens per il gimnasi da sport a Tavau. Là fila era ses frar grond Gino vid sia carriera da skis. Dad el possia ella emprender bler.

Cuppa mundiala e medaglia olimpica

Elena Sanna Stucki è ambiziusa. Betg mo sin ils skis, era en scola. Suenter la matura duai ir en direcziun medischina. Ella spera dentant che ses talent e sias prestaziuns e ses engaschi bastian – da pudair metter sin la carta skis. Ed in bel di ir a la partenza da cursas da skis da la cuppa mundiala. E sco mintga sportist, siemia era la giuvna talentada sursilvana d'ina medaglia a gieus olimpics, il pli gugent quella dad aur.

Sportissimo 17:00

Artitgels legids il pli savens

Scrollar a sanestra Scrollar a dretga