Vulpera era al principi dal 20avel tschientaner in lieu da cura. In lieu da cura, nua ch'ils giasts eran vegndis pliras emnas, schizunt mais en vacanzas. Ils grandhotels Waldhaus u Schweizerhof eran enconuschents lunsch enturn ed attiravan osps bainstants. Quels eran a la tschertga dad in'occupaziun. Uschia è il sport da golf vegnì a Vulpera.
Igl è schon fitg interessant. A Vulpera pon ins anc giugar golf sco che golf è. Sin ina plazza fitg variada ch'è vegnida integrada en la natira.
Cumenzà cun duas, uss datti nov foras
La plazza da golf da Vulpera è vegnida construida dal Scot Gordon Spencer. Suenter ch'i vegniva giugà l’entschatta mo sin duas foras al lieu nua che la driving range sa chatta anc oz, è la plazza vegnida engrondida. La plazza da golf da Vulpera è vegnida integrada en la cuntrada existenta, senza ch'ins aveva stuì muventar ina massa terren. La plazza da golf porscha oz tut quai ch'ins dovra per pudair giugar quest sport.
230 commembers e 30 giuvnas e giuvens
Durant la pandemia da corona han blers giasts svizzers scuvert l’Engiadina Bassa ed era la pussaivladad da giugar golf a Vulpera. Inqual giast è restà sco proprietari da segunda abitaziun. Persunas giuvnas bandunan dentant sco savens las regiuns periferas pervia da lur scolaziun e las pussaivladads da lavurar en ils centers. La gronda sfida vegn ad esser en il futur che quels restan fidaivels al club ed al sport.
Or da l'archiv:
