Gia avant la nova stagiun da passlung ha il passlunghist engiadinais Curdin Perl annunzià che questa saja si'ultima stagiun en la cuppa mundiala da skis.
Per animar ses amis e sponsurs da sustegnair el er durant l'ultima stagiun en la cuppa mundiala da passlung era Curdin Perl a la tschertga dad ina sfida tut speziala. Or da bleras ideas è naschida l’idea dad empruvar dad ir cun skis da passlung sin il Piz Palü:
Jau hai ditg da vulair ir sin il Palü cun ils medems skis sco che autras persunas fan il maraton engiadinais.
La fin da matg ha Curdin Perl sa mess en viadi
Suenter ina lunga fasa da preparaziun ha Curdin Perl decis da vulair pruvar la sfida la fin da matg da quest onn. Ensemen cun trais guids da muntogna da Puntraschigna, cun in helicopter e cun ina equipa entira da televisiun ha il passlunghist ristgà la sfida.
Davent dal Pass dal Bernina, sur il Lago Bianco, si da la Val Arlas, sin il glatscher dal Palü ed a la fin sin il Piz Palü sin 3900 meters sur mar.
Igl era fitg grev da chattar il meglier di per empruvar da far la tura sin il piz.
Gartegià u betg – quai mussa «Passiun Passlung»
Curdin Perl n’ha dentant anc betg vulì tradir sche quai e gartegià u betg. Quai ves’ins en il film documentar ch'in team da camera ha fatg durant l’emprova dad ir cun skis da passlung sin il Piz Palü.
Il film documentar vegn preschentà questa sonda saira las 19:00 en il Rondo a Puntraschigna. Lura datti era in discurs cun il sportist che raquinta da sias aventuras e la pussaivladad da sustegnair el er durant sia davosa stagiun en la cuppa mundiala da skis.
RR Sportissimo 17:00