Suenter siat gieus ha l'equipa da Cuira 97 mo tschintg puncts sin il conto. Uschia è l'equipa grischuna actualmain sin plaz 11 da 14 equipas. Cler ch'il club ha tut autras aspectativas.
A lunga vista puspè dar en 1. liga
Dapi bun 3 emnas ha Cuira 97 cun Mariano Di Spirito in nov schef da sport. La finamira è da manar l'equipa puspè en l'emprima liga. Uss saja dentant da guardar gieu per gieu, uschia che nus sajan a la fin da la runda d'atun amez la tabella. Puspè dar cunter la relegaziun vul nagin dal club.
Mariano Di Spirito è optimistics cunquai ch'el vesa ina gronda veglia tar ils giugaders. L'equipa haja suenter ina flaivla partenza uss chattà la dretga via.
Optimistics era pervia d'in nov transfer
Avon paucas emnas ha Cuira engaschà il giugader Alfred. In Nigerian da 35 onns cun in'enorma qualitad. El saja in top-giugader che fetschia l'entira equipa pli ferma, di il schef da sport Mariano Di Spirito. Tar la suletta victoria questa stagiun cunter Uster è Alfred stà involvà tar tut ils gols da Cuira.
Bainbaud nov trenader per Cuira
Actualmain è l'anteriur giugader da la Bundesliga, Michael Nushöhr il trenader da Cuira 97, quai dentant mo ad interim. Mez october veglian els preschentar il nov schef sin lingia, di Mariano Di Spirito. Sch'igl è ina persuna interna u externa na vul el dentant betg tradir. En mintga cas vegn il nov um gia ad esser il tschintgavel trenader tar Cuira entaifer ils dus ultims onns.
RR actualitad 07:00