La festa da lutga da Chapella a S-chanf

La festa da lutga Chapella a S-chanf è naschida avant bun 10 onns. E quai ch’ha cumenzà fitg pitschen è entant creschì ad in eveniment remartgabel – ad in inscunter da passa 50 buobs che vegnan cunzunt da la regiun dentant er dal Partenz, da Cuira e da la Svizra Centrala.

La festa da lutga Chapella a S-chanf. Bild in Lightbox öffnen.

Legenda da maletgs: La festa da lutga Chapella a S-chanf ha cumenzà. RTR, R. Dobler

Tge buob che fa lutga na siemia betg da vegnir ina giada uschia ferm sco ils retgs da lutga Matthias Sempach, Killian Wenger o Jörg Abderhalden. Er quels han entschet da buobs a far la lutg, sco quels che participeschan questa fin d'emna a la lutga da Chapella a S-chanf.

Gronda delegaziun dal chantun Sviz

En tut participeschan passa 50 buobs a la lutga da Chapella. Annunziadas èn en tut 5 delegaziuns: uschia ch’i dat ina delegaziun dal club da lutga da Cuira, ina da Landquart, ina dal club da lutga dal Partenz lura er dal club indigen, da la Societad da lutga Engiadinaisa. La delegaziun la pli gronda, cun quasi 20 buobs, vegn dentant dal club da March-Höfe dal chantun Sviz.

Societad da lutga nascha

Cumenzà ha tut cun in per babs, amis da la lutga. Els han entschet cun la lutga da Chapella avant bun 10 onns. Lura è l'eveniment vegnì adina pli grond. Ins ha vesì che l’interess e qua da porscher quest sport er en l’Engiadina. Or da la lutga da Chapella è lura er naschida la Societad da lutga Engiadinaisa il 2011 ed il tschaler da lutga ch’i dat dapi lura en il center da sport Serlas a S-chanf.