Ils organisaturs da Lai deploreschan questa decisiun. Els hajan spetgà enfin il davos termin e sajan s'engaschads di per di per pudair organisar questas cursas. Tant pli fetschia quai ussa mal da betg pudair manar atras questa cuppa mundiala dals 4 fin ils 6 da settember, uschia Christoph Müller, president dal comité d’organisaziun.
Dapli che 1'000 persunas
Il davos era vegnì examinà da manar atras questas cursas senza aspectaturs. Ma er lura fissan stadas tranter 1’500 e 1’800 persunas al lieu cun tut ils atlets, funcziunaris, organisaturs, gidanters e schurnalists, ed uschia in bun tant sur las 1’000 persunas lubidas. Actualmain na possia nagin garantir ch’ins survegnia ina lubientscha da manar atras occurrenzas cun dapli che 1'000 persunas a partir dal settember, quai sforza ils organisaturs da sutterrar quest event.
Il Cussegl federal n’aveva prendì nagina decisiun en chaussa en sia conferenza da pressa dals 19 da zercladur ed ha surdà la responsabladad enavos als chantuns.
Tut dat en l'aua
Las cursas da la cuppa mundiala eran l’emprim vegnidas spustadas da l’avust sin il settember. Durant l'emprima fin d'emna da settember fissan stadas sin il program al pe dal Rothorn cursas da la cuppa mundiala en las disciplinas cross-country e downhill. Ussa èsi dentant definitiv ch'i na vegn quest onn tar nagin spectacul da mountainbike a Lai.
