Siglir tar il cuntegn
Inhalt

Regiunal Lai: Suenter la cuppa mundiala è avant ils Campiunadis mundials

Cun la bella victoria dal campiun olimpic e mundial Nino Schurter è la terza ediziun da la cuppa mundiala da mountainbike a Lai ida a fin. En in onn èn lura en il medem lieu ils Campiunadis mundials.

Nino Schurter giubilescha sin il podest a Lai cun sprizzar enturn ord ina butteglia champagner.
Legenda: Nino Schurter spera er da pudair giubilar en in onn al campiunadi mundial a Lai. Keystone

Quels èn lura anc ina giada in numer pli gronds. Uschia dovri lura enstagl da 250 voluntaris da quai da 400. Era il program da divertiment enturn las cursas da downhill e da cross country duess daventar pli gronds ed attractivs. Sco era l'entira logistica ch'è pli pretensiusa, uschia il president dal comité d’organisaziun Christoph Müller. Uschia dovrian per exempel ils divers expositurs sin l’areal da las pendicularas da Lai bler dapli plaz.

Lai vul daventar in «mecca» dal mountainbike

Cun ils Campiunadis mundials dals 4 fin ils 9 da settember 2018 scada il contract da Lai cun la Federaziun internaziunala da ciclissem UCI. Mo Lai vul restar vinavant in termin fix en il chalender internaziunal da mountainbike. Tenor Christoph Müller saja Lai actualmain en contractivas cun l’UCI per pudair organisar ils onns 2019 fin 2021 trais ulteriuras concurrenzas da la cuppa mundiala da mountainbike. Quai saja ina part da la strategia a lunga vista da la destinaziun da vacanzas da Lai, uschia Müller. Quella vul organisar regularmain l’enviern cursas da la cuppa mundiala da ski alpin ed etappas dal Tour de ski e la stad cursas da la cuppa mundiala da mountainbike.

RR actualitad 17:00