La stagiun da hockey passada è istorgia. Tuttina tge resultats ch'ins ha cuntanschì. Da quels na pon ins cumprar nagut. E tuttina guardan las squadras da hockey grischunas da la segunda liga - Lai Valbella e CDH Engiadina - anc adina in zichel sin la davosa stagiun. Omaduas equipas èn avanzadas fin en il mezfinal. Ed omadus equipas vulan puspè cuntanscher almain quel resultat.
Lai Valbella cun novs trenaders
Per raschuns professiunalas e privatas ha il trenader Ivo Simeon mess a disposiziun ses post. Uschia che Lai Valbella ha l’emprim stuì chattar in nov trenader. Cun l'anteriur goli Leon Sarkis han ins chattà a Lai in trenader or da l'agen ravugl. Sarkis è trenader da juniors e schef da sport da l’equipa. El vegn a timunar la squadra durant la proxima stagiun cun Flavio Cola ed Yves Koch.
Il trio è da buna fai. Tenor Leo Sarkis è l’equipa da Lai Valbella anc pli ferma che la stagiun passada. Cun quest cader che dispona dad ina massa experientscha pon ins cumbatter per il titel en segunda liga.
Jau ves la proxima stagiun extrem positiv.
CDH Engiadina cun fitg giuvna equipa
Quai ch'il CDH Engiadina ha mussà la stagiun passada è stà unic. Anc mai n'era l’equipa avanzada fin en il mezfinal. Anc mai n'era la squadra a la fin da la stagiun tranter las quatter meglras equipas da la segunda liga. Per il CDH Engiadina era la qualificaziun per ils mezfinals ina gronda chaussa. Insatge che l’equipa vuless il pli gugent repeter. Sco mintga stagiun vegn quai dentant a vegnir difficil.
Il CDH Engiadina è anc ina giada vegni in zichel pli giuven. Il trenader Benny Wunderer ha empruvà dad integrar giugaders da l’annada 2008 or da l’atgna partiziun da juniors. En l'avegnir duai il cader da la squadra puspè vegnir pli lad. Tar l'Engiadina vegnan uss plaunet puspè annadas cun dapli giugaders da hockey.
Nus vegnin puspè ad avair ina equipa fitg giuvna.
