Las loipas en il Grischun avran pli e pli baud

Malgrà ch’ils prads èn anc verds u brins avran gia las emprimas loipas da passlung. Gia davent da questa sonda, ils 28 d'october, pon ins far passlung a Tavau ed a Lantsch en la destinaziun turistica da Lai.

La naiv vegn repartida sin la loipa Bild in Lightbox öffnen.

Legenda da maletgs: Snowfarming Tavau La naiv vegn repartida sin la loipa MAD/Davos Klosters/Marcel Giger

Avant diesch onns èn ils da Tavau stads ils emprims en Svizra ch'han pudì offrir gia a la fin d'october ina loipa. Sco il schef dal lavuratori communal Norbert Gruber ha ditg ad RTR hajan els preparà quella loipa en emprima lingia per l'equipa naziunala da passlung enturn Dario Cologna. Oz vegnia quella loipa era nizzegiada d'equipas dad autras naziuns. Dasper saja quella loipa sa chapescha era ina purschida turistica.

Concurrenza entaifer il Grischun

Ditg èn ils da Tavau stads ils sulets ch’han purschì gia a la fin d’october ina loipa. Dapi trais onns datti dentant ina tala purschida era en la destinaziun turistica da Lai, quai en l’Arena da biatlon a Lantsch. Era qua èsi oriundamain stà ina purschida per sportists d’elita ha il gestiunari Silvio Baselgia detg ad RTR. A Lantsch trenescha tranter auter l’equipa naziunala da biatlon cun las trais soras Gasparin. Lai dettia dentant sapientivamain bler spazi als sportists da hobi, uschia saja la loipa mo reservada da las 9 fin las 11 per ils sportists d’elita.

Snowfarming Tavau - naiv ord la conserva!

1:08 min, Nouvo RTR dals 26.10.2017

Dus sistems mo il medem effect

Per pudair offrir gia a la fin d’october ina loipa nizzegian Tavau e Lantsch dus sistems divers. A Tavau sa numna quai "Snowfarming", ina metoda da conservar naiv durant la stad. Durant l’enviern vegn producì en in lieu sumbrivaun al pè dal Pass dal Flüela in brav mantun naiv artifiziala, ni sco ins schess correct naiv tecnica, quella vegn cuvrida cun resgim ch'isolescha e conserva. L’atun vegn quella naiv lura repartida cun camiuns ed ì vegn preparà ina loipa da 4 kilometers.

A Lantsch vegn la naiv producida pir l’atun cura ch’i dovra ella, quai grazia ad in sistem che sa numna "Snowfactory", fabrica da naiv. Aua vegn sfradentada uschia ch'ins sa era producir naiv tecnica tar temperaturas sur null grads. Il sistem è in auter, l’effect il medem. Ton a Lantsch sco a Tavau sa ins gia far passlung a la fin d'october.


Laschar ir video «Snow-farming a Tavau maina success»

Snow-farming a Tavau maina success

3:12 min, Telesguard dals 24.10.2017

RR actualitad 17:00